રંગપુર શાળાના બાળ અષ્ટપ્રધાનમંડળે જિલ્લા વહીવટી તંત્રની મુલાકાત લઈ મેળવ્યું વહીવટી કામગીરીનું પ્રત્યક્ષ જ્ઞાન
નવસારી : વિદ્યાર્થીઓમાં નેતૃત્વ, જવાબદારી, લોકશાહી મૂલ્યો અને વહીવટી વ્યવસ્થાની સમજ વિકસે તેવા શૈક્ષણિક હેતુ સાથે રંગપુર પ્રાથમિક શાળાના બાળ અષ્ટપ્રધાનમંડળ દ્વારા નવસારી જિલ્લા વહીવટી તંત્રની વિવિધ કચેરીઓની શૈક્ષણિક મુલાકાત યોજવામાં આવી હતી.
આ મુલાકાત દરમિયાન બાળ અષ્ટપ્રધાનમંડળના સભ્યોએ જિલ્લા પ્રાથમિક શિક્ષણાધિકારી (DPEO), જિલ્લા વિકાસ અધિકારી (DDO) તેમજ જિલ્લા કલેક્ટરશ્રીની કચેરીની મુલાકાત લઈને વહીવટી કામગીરી અને સરકારી તંત્રની કાર્યપદ્ધતિ વિશે પ્રત્યક્ષ જાણકારી મેળવી હતી.
આ પ્રસંગે જિલ્લા પ્રાથમિક શિક્ષણાધિકારી શ્રી ડૉ. અરુણકુમાર અગ્રવાલ સાહેબ તથા જિલ્લા કલેક્ટર શ્રી મનીષ ગુરવાની સાહેબ સાથે વિદ્યાર્થીઓને સંવાદ કરવાની તક મળી હતી. અધિકારીઓએ બાળકો સાથે આત્મીયતાપૂર્વક વાતચીત કરી તેમની જિજ્ઞાસાઓને સાંભળી હતી અને વિવિધ વહીવટી જવાબદારીઓ, નિર્ણય પ્રક્રિયા તથા જાહેરસેવાના મહત્વ વિશે સરળ ભાષામાં માર્ગદર્શન આપ્યું હતું.
બાળ અષ્ટપ્રધાનમંડળના સભ્યોએ અધિકારીઓને વિવિધ પ્રશ્નો પૂછીને સરકારી કચેરીઓની કામગીરી, અધિકારીઓની ભૂમિકા અને નાગરિકો પ્રત્યેની જવાબદારીઓ વિશે સમજ મેળવી હતી. અધિકારીઓના પ્રેરક વિચારો અને માર્ગદર્શને બાળકોમાં નવી જિજ્ઞાસા જગાવી હતી તેમજ ભવિષ્યમાં જવાબદાર નાગરિક અને સક્ષમ નેતા બનવાની પ્રેરણા પૂરી પાડી હતી.
શાળામાં રચાયેલું બાળ અષ્ટપ્રધાનમંડળ માત્ર પદ અને જવાબદારીઓ પૂરતું સીમિત ન રહે, પરંતુ બાળકોને વાસ્તવિક જીવનમાં વહીવટી વ્યવસ્થા, લોકશાહી પ્રક્રિયા અને નેતૃત્વના ગુણોનો અનુભવ કરાવે તે આ મુલાકાતનો મુખ્ય ઉદ્દેશ રહ્યો હતો.
ખરેખર, આ મુલાકાત માત્ર સરકારી કચેરીઓની મુલાકાત નહોતી, પરંતુ બાળકોના વ્યક્તિત્વ વિકાસ, નેતૃત્વ ક્ષમતા અને વહીવટી સમજણના ઘડતર માટેનું એક જીવંત શૈક્ષણિક માધ્યમ બની રહી હતી.
