ડાંગ જિલ્લાના ગોંડલવિહિર પ્રાથમિક શાળાની ઉપશિક્ષિકા કલ્પનાબેન પુન્યાભાઈ માહલાને પ્રતિષ્ઠિત ચિત્રકૂટ પારિતોષિક–૨૦૨૫ એનાયત
આહવા, તા. ૧૬ :
ડાંગ જિલ્લાની ગોંડલવિહિર પ્રાથમિક શાળામાં ઉપશિક્ષિકા તરીકે ફરજ બજાવતા શ્રીમતિ કલ્પનાબેન પુન્યાભાઈ માહલાને શિક્ષણ ક્ષેત્રે તેમના ઉત્તમ અને સમર્પિત યોગદાન બદલ પ્રતિષ્ઠિત ચિત્રકૂટ પારિતોષિક–૨૦૨૫ થી સન્માનિત કરવામાં આવ્યા છે. આ એવોર્ડ પ્રસિદ્ધ સંત અને રામકથા પ્રવચનકાર પૂજ્ય શ્રી મોરારી બાપુના પાવન હસ્તે તા. ૧૪/૦૧/૨૦૨૬ ના રોજ એનાયત કરવામાં આવ્યો હતો.
આ ગૌરવસભર સન્માન ભાવનગર જિલ્લાના તળગાજરડા ખાતે મોરારી બાપુના પાવન સાનિધ્યમાં યોજાયેલા કાર્યક્રમ દરમિયાન આપવામાં આવ્યું હતું, જેમાં રાજ્યભરના શ્રેષ્ઠ પ્રાથમિક શિક્ષકોને તેમના શિક્ષણક્ષેત્રે કરેલા ઉત્કૃષ્ટ યોગદાન બદલ સન્માનિત કરવામાં આવ્યા હતા.
કલ્પનાબેન માહલાએ પોતાની શિક્ષણ સેવા ટાકલીપાડા વર્ગ શાળાથી શરૂ કરી હતી, જ્યાં તેમણે વિદ્યાર્થીઓના સર્વાંગી વિકાસ માટે નિષ્ઠાપૂર્વક કાર્ય કર્યું. વર્ષ ૨૦૨૪માં તેમની બદલી ગોંડલવિહિર પ્રાથમિક શાળામાં થતાં પણ તેમણે એ જ ઉત્સાહ અને સમર્પણ સાથે શિક્ષણ કાર્ય આગળ વધાર્યું છે. તેમને અગાઉ તાલુકા શ્રેષ્ઠ તથા ડાંગ જિલ્લા શ્રેષ્ઠ શિક્ષક એવોર્ડથી પણ સન્માનિત કરવામાં આવ્યા છે.
તેમણે ચાઇલ્ડ યુનિવર્સિટી, ગાંધીનગર ખાતે સ્વનિર્મિત શૈક્ષણિક રમકડાંનું પ્રદર્શન કર્યું છે તેમજ રાજ્ય કક્ષાના ઇનોવેશન ફેસ્ટિવલમાં ભાગ લઈ નોંધપાત્ર સિદ્ધિ પ્રાપ્ત કરી છે. GCERT, ગાંધીનગર ખાતે યોજાયેલી કાર્યશાળાઓમાં પણ તેમણે સક્રિય ભાગ લીધો છે. બાળકોમાં જ્ઞાન સાથે સંસ્કાર, શિસ્ત અને આત્મવિશ્વાસ વિકસાવવાનો તેમનો અભિગમ હંમેશા પ્રશંસનીય રહ્યો છે.
આ સન્માનથી ડાંગ જિલ્લા પ્રાથમિક શિક્ષક સંઘ, શિક્ષક સમુદાય તેમજ સમગ્ર જિલ્લામાં આનંદ અને ગૌરવની લાગણી વ્યાપી છે. શિક્ષક સંઘ અને શિક્ષણપ્રેમીઓએ કલ્પનાબેન માહલાને હાર્દિક અભિનંદન પાઠવ્યા છે અને ભવિષ્યમાં પણ તેઓ શિક્ષણ ક્ષેત્રે અવનવી પ્રવૃત્તિઓ સાથે સતત પ્રગતિ કરે તેવી શુભેચ્છાઓ વ્યક્ત કરી છે.
