વાડ મુખ્ય પ્રાથમિક શાળામાં ‘આનંદ મેળો – ૨૦૨૬’નું ભવ્ય આયોજન
આ આનંદ મેળામાં શાળાના વિદ્યાર્થીઓ, વાલીઓ તેમજ ગ્રામજનો મોટી સંખ્યામાં ઉત્સાહપૂર્વક જોડાયા હતા. મેળામાં વિવિધ પ્રકારના ચટાકેદાર નાસ્તા, પરંપરાગત ભોજન તથા ઠંડા પીણાંના સ્ટોલો ગોઠવવામાં આવ્યા હતા. જેમાં પાણીપૂરી, ભેલ, સમોસા, દાબેલી, ખમણ, ઢોકળા, બટાકા વડા, બ્રેડ પકોડા, પૌઆ, ઇડલી-સાંભર, ખાસ ઉબાડિયું, મુઠીયા, શરબત, છાસ તેમજ તાજી ફ્રૂટ ડિશનો સમાવેશ થતો હતો.
આનંદ મેળાનો મુખ્ય હેતુ વિદ્યાર્થીઓમાં સહકારભાવ વિકસાવવો, વ્યવહારુ શિક્ષણ આપવું તેમજ સામાજિક જોડાણ મજબૂત કરવાનું હતું. સાથે સાથે ગાણિતિક મૂલ્યોને દૈનિક જીવનમાં કેવી રીતે ઉપયોગી બનાવી શકાય તે અંગે વિદ્યાર્થીઓને પ્રાયોગિક અનુભવ પણ પ્રાપ્ત થયો હતો.
આ કાર્યક્રમમાં એસએમસીના અધ્યક્ષ શ્રી દિનેશભાઈ પટેલ સહિત એસએમસીના સભ્યો, વાલીઓ અને મોટી સંખ્યામાં ગ્રામજનો ઉપસ્થિત રહ્યા હતા. સમગ્ર કાર્યક્રમ શાળાના સ્ટાફ, વિદ્યાર્થીઓ તથા વાલીઓના સહયોગથી સફળતાપૂર્વક સંપન્ન થયો હતો.
કાર્યક્રમના અંતે શાળાના આચાર્યશ્રી કિરીટભાઈ પટેલે ઉપસ્થિત તમામ વાલીઓ અને ગ્રામજનોનો હૃદયપૂર્વક આભાર વ્યક્ત કર્યો હતો.
