Shamla Faliya આંગણવાડી ખાતે ‘Angan utsav’ની ઉત્સાહભેર ઉજવણી
ખેરગામ, તા. 29 સપ્ટેમ્બર 2026:
શામળા ફળિયા આંગણવાડી ખાતે તા. 29 સપ્ટેમ્બર, 2026ના રોજ **‘આંગણ ઉત્સવ’**ની ઉત્સાહભેર ઉજવણી કરવામાં આવી હતી. કાર્યક્રમનો મુખ્ય હેતુ બાળકો, કિશોરીઓ અને વાલીઓમાં પોષણ, આરોગ્ય અને સ્વચ્છતા અંગે જાગૃતિ કેળવવાનો હતો.
કાર્યક્રમનો પ્રારંભ ખેરગામ ગ્રામ પંચાયતના સભ્ય શ્રીમતી હેમલતાબેન પટેલ તથા પૂર્વ સરપંચ શ્રી કાર્તિકભાઈ પટેલના હસ્તે દીપ પ્રાગટ્ય સાથે કરવામાં આવ્યો હતો. આંગણવાડીના નાના ભૂલકાંઓ દ્વારા સુંદર પ્રાર્થના રજૂ કરવામાં આવી હતી.
આ પ્રસંગે બાળકોને નાગલીની સુખડી તથા ફળોનું વિતરણ કરવામાં આવ્યું હતું તેમજ ઉપસ્થિત મહેમાનો માટે નાસ્તાની વ્યવસ્થા કરવામાં આવી હતી. કિશોરીઓ તથા કુપોષણ ધરાવતા બાળકોના વાલીઓને THR કીટનું વિતરણ કરવામાં આવ્યું હતું.
કુપોષણમાંથી તંદુરસ્ત બનેલા બાળકને ‘પોષણ ચેમ્પિયન’ તરીકે ઇનામ આપી પ્રોત્સાહિત કરવામાં આવ્યું હતું. કિશોરીઓ તથા વાલીઓએ આંગણવાડી મારફતે સરકાર દ્વારા કરવામાં આવતી પોષણલક્ષી કામગીરી અંગે પોતાના પ્રતિભાવો રજૂ કર્યા હતા.
આંગણવાડી કાર્યકર, હેલ્પર તથા આશા વર્કરને તેમની કામગીરી બદલ પ્રમાણપત્ર આપી સન્માનિત કરવામાં આવ્યા હતા.
આ પ્રસંગે ગુજરાતના મુખ્યમંત્રી શ્રી ભૂપેન્દ્ર પટેલના સંદેશમાં કિશોરીઓને કિશોરાવસ્થામાં પૌષ્ટિક અને સંતુલિત આહાર, નિયમિત વ્યાયામ, સ્વચ્છતા તથા આરોગ્ય પ્રત્યે જાગૃત રહેવા અનુરોધ કરવામાં આવ્યો હતો. દાળ, કઠોળ, લીલાં શાકભાજી, ફળો, દૂધ સહિતના પૌષ્ટિક આહારને રોજિંદા જીવનનો ભાગ બનાવવા પર ભાર મૂકવામાં આવ્યો હતો.
સંદેશમાં કિશોરીઓને પરિવાર અને સમાજમાં પોષણ અંગે જાગૃતિ ફેલાવવા તથા સ્વસ્થ અને સશક્ત સમાજના નિર્માણમાં યોગદાન આપવા પ્રેરણા આપવામાં આવી હતી.
કાર્યક્રમમાં જિલ્લા પંચાયતના સભ્ય શ્રીમતી મોહિનીબેન પટેલ, ICDS ચીખલીના સુપરવાઈઝર શ્રીમતી રશ્મિતાબેન પટેલ, આંગણવાડી કાર્યકર વૈશાલીબેન પટેલ, શાળાના આચાર્યશ્રી, શિક્ષિકા શ્રીમતી પ્રિયંકાબેન દેસાઈ, બાળકોના વાલીઓ તથા કિશોરીઓ ઉપસ્થિત રહ્યા હતા.
આંગણ ઉત્સવના માધ્યમથી બાળ પોષણ, કિશોરી આરોગ્ય અને પોષણ અંગે જાગૃતિનો મહત્વપૂર્ણ સંદેશ આપવામાં આવ્યો હતો.
