વિશ્વ આદિવાસી દિવસ નિમિત્તે સંકલ્પ એજ્યુકેશન ટ્રસ્ટનો માનવતાભર્યો પ્રયાસ
ત્રણ ગામોના 350થી વધુ બાળકો સુધી પહોંચી રૂ. 1 લાખની શૈક્ષણિક સહાય
ગણદેવી/બીલીમોરા, તા. 9 ઓગસ્ટ, 2026: વિશ્વ આદિવાસી દિવસની ઉજવણીને સેવાકાર્ય સાથે જોડતા સંકલ્પ એજ્યુકેશન ટ્રસ્ટ દ્વારા ગણદેવી અને બીલીમોરા નજીકના ત્રણ ગામોમાં જરૂરિયાતમંદ બાળકો અને પૂર અસરગ્રસ્ત પરિવારો માટે સહાય કાર્યક્રમ યોજવામાં આવ્યો હતો.
તાજેતરમાં સર્જાયેલી પૂરપરિસ્થિતિને ધ્યાનમાં રાખીને વાઘરેચ, ક્લમઠા નાયકીવાડ ફળિયું અને ધમડાચા ગામોમાં બાળકોને શિક્ષણ માટે ઉપયોગી સામગ્રી આપવામાં આવી હતી. કાર્યક્રમ દરમિયાન 350થી વધુ બાળકોને અંદાજે રૂ. 1 લાખની શૈક્ષણિક કીટનું વિતરણ કરવામાં આવ્યું. કીટમાં નોટબુક, સ્કૂલબેગ, બોલપેન સહિતની જરૂરી સામગ્રીનો સમાવેશ કરવામાં આવ્યો હતો.
શિક્ષણની સાથે આપત્તિના સમયમાં પરિવારોને રાહત મળે તે હેતુથી કેટલાક જરૂરિયાતમંદ પૂરપીડિત પરિવારોને બ્લેન્કેટનું પણ વિતરણ કરવામાં આવ્યું હતું.
ટ્રસ્ટની આ પહેલનો મુખ્ય ઉદ્દેશ મુશ્કેલ પરિસ્થિતિમાંથી પસાર થઈ રહેલા બાળકોને અભ્યાસ માટે જરૂરી સાધનો ઉપલબ્ધ કરાવી તેમના શિક્ષણમાં સતત પ્રોત્સાહન પૂરું પાડવાનો રહ્યો હતો. વિશ્વ આદિવાસી દિવસના અવસર પર હાથ ધરાયેલી આ પ્રવૃત્તિને સ્થાનિક ગ્રામજનો અને સેવાભાવી નાગરિકોએ આવકારી હતી.
આ સેવાકીય અભિયાનમાં મિનેષભાઈ પટેલ, કૌશિકભાઈ પટેલ, બીપીનભાઈ પટેલ, હેમંતભાઈ પટેલ, અશ્વિનભાઈ નાયકા તથા ઓરકેસ્ટ્રા પાર્ટી અને તેમની ટીમ, હાર્દિકભાઈ પટેલ, મનહરભાઈ પટેલ, રમેશભાઈ પટેલ તથા તેમના મિત્રો, સંદીપભાઈ પટેલ, વિકીભાઈ ટેલર અને નિલેશભાઈ પટેલ (શિક્ષક, વલવાડા) સહિત અનેક શિક્ષકો, સામાજિક કાર્યકરો, ગામના આગેવાનો અને સેવાભાવી સહયોગીઓ જોડાયા હતા.
આ પ્રસંગે આયોજકોએ જણાવ્યું હતું કે બાળકોને અભ્યાસ માટે જરૂરી સાધનો મળે અને આપત્તિગ્રસ્ત પરિવારોને મુશ્કેલીના સમયમાં થોડી રાહત મળી રહે તે હેતુથી આ સેવાકીય પ્રવૃત્તિ હાથ ધરવામાં આવી છે. શિક્ષણ ક્ષેત્રે કરવામાં આવતી નાની મદદ પણ બાળકના ભવિષ્ય માટે મહત્વપૂર્ણ બની શકે છે.
સંકલ્પ એજ્યુકેશન ટ્રસ્ટની આ પહેલે વિશ્વ આદિવાસી દિવસને સેવા, સહકાર અને શિક્ષણના સંદેશ સાથે ઉજવવાનો સકારાત્મક પ્રયાસ રજૂ કર્યો છે.
